GaleriNEWYDDION
GWOBRWYO CLYBIAU FFERMWYR IFANC CYMRU AM EU PROSIECTAU AMGYLCHEDDOL A’U HYSBRYD CYMUNEDOL!
Mae tri chlwb o Fudiad Ffermwyr Ifanc Cymru wedi derbyn gwobr am eu prosiectau amgylcheddol a’u hysbryd cymunedol fel rhan o Her y Gymuned a’r Amgylchedd (HGA).
Cyflwynodd nifer o glybiau, a oedd yn cymryd rhan yn yr her, manylion ynglŷn â’u gwaith cymunedol i banel o feirniaid yn y Ffair Aeaf eleni.
Dywedodd Dylan Jones, Cadeirydd Pwyllgor Materion Gwledig CFfI Cymru: “Mae’r gwobrau yn ffordd dda o gael aelodau i gydweithio a dysgu sgiliau newydd. Mae’r amgylchedd ehangach a chymunedau gwledig hefyd yn elwa.”
Unwaith eto cafwyd nifer o geisiadau amrywiol yn 2009. Ymgeisiodd clybiau ar draws Gymru gyda nifer o brosiectau gwahanol o fewn y tri chategori - cefn gwlad a’r amgylchedd, cymuned a threftadaeth a digwyddiad neu adloniant.
Yr enillydd haeddiannol yn y categori ‘Cefngwlad a’r Amgylchedd’ oedd “The Secret Garden” gan CFfI Wentwood, Gwent. Roedd y clwb wedi gweithio gyda chynlluniau gan blant ysgol er mwyn trawsffurfio ardal o dir diffaith mewn i ystafell ddosbarth awyr agored a gardd gudd ar gyfer eu hysgol gynradd leol. Bu’r aelodau yn creu ardal ddiogel ar gyfer plant Ysgol A.R.W er mwyn chwarae a dysgu am natur. Mae’r ardd yn cynnwys llwybr synhwyrau, fainc bren ar gyfer dweud storïau a cherflun helygen sy’n cael ei greu ar hyn o bryd.
Yn siarad ar ran y beirniad, dywedodd Mr John Lloyd Jones, Cadeirydd Cyngor Cefn Gwlad Cymru: “Cawsom ein plesio gan y ffordd yr oedd clwb yma wedi mynd ati i ymgymryd â phrosiect enfawr, er mwyn creu lle hwyliog a thawel ar gyfer addysg awyr agored yn yr ysgol yn ogystal â chreu cyfleoedd gwych ar gyfer bywyd gwyllt lleol. Gweithiodd y clwb yn galed gan wneud penderfyniadau call a defnydd llawn o ddeunyddiau wedi eu hailgylchu megis hen deiars a defnyddio busnesau lleol a sgiliau arbenigwyr lleol. Roedd hwn yn brosiect cymunedol gwych, “Gardd Gudd” sy’n darparu’r ysgol, mudiadau lleol a bywyd gwych gydag adnodd gwych.”
CFfI Llantrisant, Morgannwg oedd enillwyr y categori ‘Cymuned a Threftadaeth’ gyda’u “Care about your FOOD, WE DO”. Roedd y clwb wedi chwarae rhan flaenllaw mewn digwyddiad Open Farm Sunday sy’n ddigwyddiad blynyddol sy’n cael ei gydlynu gan LEAF (Linking Environment and Nature) ar y dydd Sul cyntaf ym mis Mehefin bob flwyddyn. Mae annog y cyhoedd, sy’n dod o ardaloedd trefol yn bennaf yn ardal Morgannwg i ddysgu sut y mae bwyd lleol yn cael ei gynhyrchu a ble mae’n dod ohono yn bwysig ar gyfer aelodau’r clwb. Yn ystod y dydd, cafwyd teithiau natur hefyd er mwyn dangos y bwyd gwyllt sydd i’w gael ar y fferm i’r cyhoedd. Daeth y diwrnod i ben gyda phawb yn derbyn cawl cartref.
“Roedd y clwb yma wedi mynd ati i gydweithio gyda fferm leol nid yn unig er mwyn agor eu gatiau yn ystod y digwyddiad Open Farm Sunday, ond hefyd i ddarparu teithiau er mwyn edrych ar fywyd gwyllt a sesiynau addysgiadol ar fwyd ac amaeth a chawsom ein plesio gan hyn. Mae’r bartneriaeth rhwng y fferm a’r clwb wedi datblygu’n dda ac mae’r clwb yn benderfynol o wneud hyn yn ddigwyddiad blynyddol ac yn gobeithio annog eraill i ymgymryd â phrosiectau tebyg drwy Gymru.”
CFfI Erwood, Brycheiniog enillodd y categori Adloniant a Digwyddiad. Cododd y clwb dros £6,000 ar gyfer elusennau drwy gynnal nifer o ddigwyddiadau llwyddiannus ac arloesol. Roedd y rhain yn amrywio o bryd o fwyd gyda thema hanesyddol y porthmyn, wedi ei gynnal mewn ysgubor ar fynydd yr Eppynt i sioe ffaswin gyda gwahaniaeth. Yn ystod y sioe ffasiwn ddefnyddiwyd dillad wedi eu “hailgylchu” o siop elusen er mwyn eu gwerthu, syniad unigryw iawn. Bu’r clwb hefyd yn cymryd rhan Wythnos Genedlaethol Ymgyrch y Welis er mwyn cefnogi a chodi ymwybyddiaeth o RABI.
Dywedodd Dylan Jones: “Mae nifer o’n clybiau ar draws Gymru yn cymryd rhan mewn prosiectau cymunedol ac amgylcheddol yn rheolaidd gan wirfoddoli eu sgiliau, gwaith llafur a gallu codi arian. Mae Cynllun Her y Gymuned yn rhoi cymorth i’r clybiau hyn i gael cydnabyddiaeth am eu gwaith caled. Gyda’r arian grant sydd ar gael drwy CFfI Cymru, gyda chefnogaeth gan Gyngor Cefn Gwlad Cymru rydym yn medru cynnig ychydig o gefnogaeth ariannol er mwyn gwneud y prosiectau hyn yn bosib.”